Róžant (JK/SN). Dokelž njeměještaj składnosć, sej podłožki nastupajo naležnosć Ralbičanskeje kormjernje swini dla dokładnje spřistupnić, žadaštaj sej radźićelej Křesćan Gruhn a Tomaš Bjeńš na wčerawšim posedźenju gmejnskeje rady Ralbicy-Róžant, zo so dnjowy dypk k tutej temje na přichodne posedźenje přestorči. To zbudźi protest dalšich radźićelow, kotřiž běchu so z tejle temu hižo zaběrali. Po dlěšej diskusiji pak so na to dojednachu, lěpšeje transparency dla a k wobšěrnišej rozprawje a argumentaciji Ralbičanskim wobydlerjam napřećo, naležnosć w nowembrje wobjednać.
Jednohłósnje radźićeljo wčera nowe towaršnostne zrěčenje z Kulowskim zastaranskim předewzaćom za energiju EVSE, kotrež wjesne dźěle gmejny z płunom zastaruje, wobzamknychu. K tomu podaštaj jednaćelka Sylvia Schenker kaž tež prawiznik zawoda wotpowědne informacije wo změnach. Zasadnje so za gmejnu w nowym zrěčenju ničo njezměni. Wone bu trěbne, dokelž běchu so komunalne zakonje w Sakskej změnili, štož ma so w zrěčenju wobkedźbować.
