Chrjebja-Nowa Wjes (FAG/SN). Jónu w lěće přeměni so hrodowy park w Chrjebi-Nowej Wsy na swjedźensku milu z mnohimi sportowymi a kulturnymi wjerškami. Minjeny kónc tydźenja bě zaso raz tak daloko, zo wotměchu tam lětni, sportowy a hrodowy swjedźeń – mjeztym hižo 71. raz –, kotryž je tež lětsa zaso tysacy hosći přiwabił. „Hižo pjatk wječor poskići 130 sobuskutkowacych wulku rejwansku show. Lětsa bě na tym šěsć skupin wobdźělenych, kotrež pokazachu wulkotny třištwórćhodźinski program. Pjatkowne předstajenje je generalna proba, wšako rejwansku show njedźelu popołdnju hišće raz pokazaja“, rozłoži Reiner Preuß z kulturneho towarstwa. Lětsa steješe wšitko pod hesłom „Wobkuzłacy swět Disneyjowych filmow“. „Kostimy za program su sej kaž kóžde ­lěto žony ze wsy sami wumyslili a zešili“, Reiner Preuß doda.