Skóncowaneje hrjady dla mjenje městna w Blunjanskim Božim domje
Bluń (UH/SN/JaW). Předewšěm nětkole w dohodownym času dóstawaja cyrkwje tež w Hornjej Łužicy tójšto kedźbnosće. Fakt pak tohorunja je, zo su murje mnohich Božich domow chětro stare, tak zo so na nich wuskutki wjedra pokazuja. Blunjanska tykowana cyrkej direktnje při hłownej dróze, je domoródnym kaž tež hosćom wsy přez cyłe lěto wosebita parlička.
Dokładnje 6. decembra 1673 běchu cyrkej poswjećili, a tak wobsteji wona tuž na tymle městnje hižo 345 lět. Jeničce jeje wěža je trochu młódša, bu hakle 1786 přitwarjena. Hišće raz nimale sto lět pozdźišo, mjenujcy 1895, do cyrkwički tež pišćele zatwarichu. „Naše kemše su stajnje derje wopytane. Wulki podźěl na tym ma bjezdwěla tež naš młody organist Sebastian Paulo“, powěda čłon wosadneje rady Jörg Redlich.