Michał Zahon nowy nawoda lěsnistwoweho rewěra serbskich gmejnow

Njebjelčicy (SN/MWj). Wobsedźerjo lěsow w pjeć gmejnach zarjadniskeho zwjazka Při Klóšterskej wodźe kaž tež Rakec a dźělow Wóslinka a Kamjenca maja wot spočatka tohole měsaca nawodu lěsnistwoweho rewěra, z kotrymž móža so wo najwšelakorišich ­prašenjach tež serbsce rozmołwjeć. Po tym zo je Harald Petrick,­ wjelelětny nawoda Worklečanskeho rewěra, kaž so wón w strukturach statneho zawoda Sakski lěs oficialnje mjenuje, na wuměnk šoł, je Michał Zahon­ jeho nadawki a běrow ­blisko Njebjelčanskeho sportnišća přewzał.