Serbšćinu słyšeć, čitać a rěčeć

Dienstag, 24. September 2019
Artikel bewerten
(0 Stimmen)

Dr. Katja Brankačkec je sobudźěłaćerka na Słowjanskim instituće Akademije wědomosćow Čěskeje w Praze. Nětko je wona nadawk přewzała, kurs serbšćiny na Karlowej uniwersiće podawać. Axel Arlt je z njej wo tym rěčał.

Kak je k tomu dóšło?

K. Brankačkec: Zajim za to wšak bě hižo dlěši čas. Minjene lěta bě Towarstwo přećelow Serbow kursy organizowało. W nalěću je mje nowy direktor Srjedźoeuropskeho instituta na Filozofiskej fakulće Jiří Janouška narěčał, hač njebych chwile měła tajki kurs přewzać. Sym rady při­zwoliła.

Kotre kmanosće sej kursisća přiswojeja?

K. Brankačkec: W prěnim rjedźe ma wo to hić zajimcam zmóžnić, zo serbšćinu nałožuja, zo potajkim zrozumjace słuchanje, rěčenje a pisanje trenuja. Štóž chce, móže potom tež kredity za studij dóstać, jeli zakónčacy test wobsteji. Je to woprawdźe rěčny kurs, budźemy serbšćinu słyšeć, čitać a rěčeć.

Jedna so wo fakultatiwny poskitk, abo je tale wučba wobstatk studija?

K. Brankačkec: Kurs je jedyn z dweju fakultatiwneju na polu sorabistiki we wobłuku studija srjedźoeuropskich studijow. Tamny, k stawiznam a kulturje Łužicy, budźe docent Petr Kaleta podawać. Na tymle instituće studenća hewak słowakšćinu, pólšćinu a/abo madźaršćinu studuja. Přiswojeja sej tež zakłady rěčespyta, literaturowědy a znajomosće wo stawiznach a kulturje tutych krajow.

Kak wobšěrnje je wučba koncipowana?

K. Brankačkec: Rěčny kurs wopřijima tydźensce 90 mjeńšin.

Na čim tuchwilu slědźiće?

K. Brankačkec: Dźěłam w rěčespytnym wotrjedźe akademije a zaběram so z přirunowacym słowjanskim rěčespytom. Mój wosebity zajim słuša hornjo- a delnjoserbšćinje a jeju wuwiću w přirunanju k druhim rěčam. Runje sym tři lěta trajacy projekt wo požčonkach w serbšćinomaj a čěšćinje zakónčiła, wuslědki su runje w formje zhromadneje monografije wušli. W nowym projekće zaběramy so z wurazami negatiwnych emocijow w słowjanskich rěčach a je z gramatiskeho a woznamoweho hladanišća mjez sobu přirunujemy. Wutrobny dźak!

Veröffentlicht in Rozmołwa
Bitte anmelden, um einen Kommentar zu posten

Anzeige