Zhorjelc (AK/SN). Šulski centrum Běła Woda w nošerstwje Zhorjelskeho wo­krjesa swój kubłanski poskitk rozšěrja. Wot šulskeho lěta 2020/2021 wukubłaja tam přidatnje socialnych pedagogow na při­póznatych statnych kubłarjow. To je sejmik wokrjesa Zhorjelc na swojim zańdźenym posedźenju wobzamknył. „Chcemy poskitk rozšěrić, dokelž spó­znachmy, zo njemóža to zwonkastejacy zdokonjeć. Tohodla mamy wukubłanje tež na městnje zmóžnić“, podšmórny krajny rada Zhorjelskeho wokrjesa Bernd Lange (CDU).

Powołanskošulske centrumy móža hač do pjeć kubłanskich družin poskićeć. W Běłej Wodźe su to tuchwilu štyri šulske­ směry – powołanska šula, powołanska fachowa šula, fachowa wyša šula a fachowa šula za techniku nimo powołanja. Nětko potajkim hišće fachowa šula k tomu přińdźe. Tak sćěhuje wokrjesny sejmik poručenje šulskeje konferency, kotraž bě so 7. nowembra jednohłósnje za to wuprajiła, centrum rozšěrić.