Choćebuz (SN). Kulturna scena tuchwilu na mnohich městnach drěma. Tuž je wažne ju wubudźić. Někotři zarjadowarjo pytaja tuž nowe puće ludźi zabawjeć. ­Jedna tajka je „dobre, stare awtokino“. W swójskim awće sedźo móža zajimcy na LED-sćěnowinje filmy, koncerty a dalše kulturne podawki dožiwić.

Spěwar Alexander Knappe je w ko­operaciji z dźenikom Lausitzer Rundschau a dalšimi partnerami w běhu jenož někotrych tydźenjow wuwił nowy, z napjatosćemi pjelnjeny dosć wažny hotspot za kulturne žiwjenje we Łužicy. Njedaloko Choćebuskeho nakupowanskeho centra „Łužiski park“ w měšćanskim dźělu Gogolow nasta na betonowej podłoze Łužiski awtokino-festiwal. Wot 13. meje tam stajnje wot srjedy do njedźele kinofilmy pokazuja. Poskitk ma hišće­ hač do 14. junija trać. Ludźo dožiwjeja tam tež live-koncerty. Mjez druhim je tam tež hižo iniciator eventa Ale­xander Knappe sam ze swojej skupinu dwójce před wupředatej kulisu wustupił. Dalši koncert planuja 5. junija, kaž Nils Contius z Choćebuskeho předewzaća event & communication informuje.