Njebjelčicy (SN/MWj). Jara wobšěrnje a nadrobnje je so Njebjelčanska gmejnska rada na swojim wčerawšim posedźenju z nowej bydlenskej štwórću w Serbskich Pazlicach zaběrała. K tomu witaše zastupowacy wjesnjanosta Tomaš Klar něhdźe 15 hosći. Jim kaž tež radźićelam gmejnski planowar Gilles Bultel projekt rozłoži.
Hižo wot lěta 2013 so prócuja w Serbskich Pazlicach za Cyrkwinskim pućom nowe ležownosće wutworić. Tehdy zwrěšći to na regionalnym planje, w kotrymž běchu cyle blisko kaolinowe składy zapisane. Mjeztym su so jich hranicy přesunyli, tak zo maja nowe ležownosće k nim dosć wulki wotstawk.
