Kóždolětnje organizuje młodźinski klub Konjecy/Šunow w pózdnim lěću DSF-party, swjedźeń němsko-serbskeho přećelstwa. Při wšěch koronowych wobmjezowanjach jón tež lětsa wupadnyć dać nochcedźa. Tohodla wumyslichu sej organizatorojo wosebity koncept hygieny.
Šunow (SN/pdź). Koronapandemije dla bě lětsa w Serbach lědma swjedźenjow. Mejemjetanja, wjetše narodninske fety a wjesne swjedźenje su wotprajili. Wosebje serbska młodźina je pobrachowacych zarjadowanjow dla kónc tydźenja často wostudu pasła. Je so tež prašała, hač budu lětsa wulke a znate zarjadowanja w Serbach, kaž su to na přikład Summer-ending-openair we Wotrowje abo DSF-party w Konjecach. Dołhož njeje sej Wotrowski klub hišće cyle wěsty, hač zarjadowanje přewjedźe, je so młodźina z Konjec a Šunowa nětko oficialnje za swój najwjetši event lěta rozsudźiła.