Kónc tydźenja bě poprawom wjedro za kupanje abo zaběru w chłódnej pincy. Štóž pak bě so zmužił a sej na hornčerske wiki do Hózka dojěł, njeje to wobžarował.
Hózk (aha/SN). Před 20 lětami kupi sej Christian Schmidt něhdyši młyn w Hózku. Zo njeby twarski kompleks njewužiwany był, zarjadowa sej wón tam z Gundulu Gleinig hornčernju. Swoje wudźěłki poskićowaštaj wšelakim wobchodam, hdźež kwalitatiwnje hódne sudobja za domjacnosće rady přijimowachu. Rozhladujo so tu a tam na hornčerskich wikach zrodźištaj ideju, tajke tež pola sebje w Hózku zarjadować. Kónc tydźenja bě tomu mjeztym 16. raz, zo staj tajke na zahrodźe a na nutřkownym dworje wotměłoj. 20 hornčernjow, tež z Braniborskeje a Durinskeje je tam swoje twory poskićało. Mjez nimi bě wučena keramikarka a dźowka wobsedźerki Josefine Gleinig, kotraž w Hózkowskej hornčerni „Baćonjacy dwór“ sobu skutkuje.
