Idejowe wubědźowanje sakskeho fondsa „Čiń sobu!“ je we wosebitej kategoriji „Žiwa dwurěčnosć“ znowa tworićelskosć na dobro našeje maćeršćiny pozbudźiło. W serialu Serbske Nowiny tule rjad drobnych a małych projektow předstajeja.
Wojerowski Wjacsławkec drastowy dom chce serbsku narodnu drastu wokoło Wojerec přichodnje hišće bóle přeslědźić a k tomu přinošować ju wuchować. Dokelž su za to pjenjezy trěbne, je Towarstwo za hajenje regionalneje kultury srjedźneje Łužicy sakskemu fondsej „Čiń sobu!“ próstwu za projekt „Wnučki listuja w swójbnym albumje wowki“ zapodało. W kategoriji ReWIR, kotraž mjezsobnu zhromadnosć ludźi do srjedźišća spěchowanja staji, dóstachu za to 1 000 eurow, kaž čłonka předsydstwa towarstwa Kirsten Bejmina rozprawja.