Jedne z mało zarjadowanjow, kotrež so lětsa najebać koronapandemiju wotměja, je zelowa njedźela w klóšterskej zahrodźe w Pančicach-Kukowje. Tam maja něštožkuli nachwatać.

Pančicy-Kukow (SN/MWj). Hdyž su w lěću zela, sad a zelenina w zahrodce a na zahrodźe zrałe, zo móžeš je žnjeć, da je načasu so za to dźakować, štož stwórba dobre daruje. Takle připowědźa Křesćansko-socialny kubłanski skutk zelowu njedźelu 16. awgusta w zahrodźe klóštra Marijineje hwězdy w Pančicach-Kukowje. Tale tradicija zdawa so lěto a woblubowaniša być. Po stach tam zajimcy přichadźeja. Runje lětsa budźe nawal najskerje wosebje wulki. Wšako korony dla telko zarjadowanjow njewabi.