Přewšo agilni a mnohostronscy

Donnerstag, 13. August 2020
Artikel bewerten
(0 Stimmen)
Pětr Dźisławk, předsyda towarstwa Serbska murja, so ze swojimi sobuwojowarjemi wo aktiwne młodźinske žiwjenje stara.  Foto: Alfons Handrik Pětr Dźisławk, předsyda towarstwa Serbska murja, so ze swojimi sobuwojowarjemi wo aktiwne młodźinske žiwjenje stara. Foto: Alfons Handrik

Nimo wulkich nadregionalnych serbskich­ towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne­ dźěło wukonjeja, wo nich pak přewjele njezhoniš. W swojej lětnjej seriji­ lětsa tajke aktiwne cyłki před­sta­jamy, dźensa Serbsku murju (12).

Kónc julija 2016 wotmě so XXXI. swětowy dźeń młodźiny w Krakowje. Na tym mjezynarodnym zetkanju katolskich młodostnych z cyłeho swěta bě mjez wobdźělnikami tež něhdźe 50 serbskich. Kaž druzy woni tohorunja ze serbskej chorhoju po měsće spěwajo ćahachu. Módro-čerwjeno-běłeje barby na chorhoji dla mějachu jich někotři za Rusow abo Francozow. Skupina z Bayerskeje so dźiwaše nad dobrej němčinu serbskich młodostnych. Dyrbjachu wšak přiznać, zo hišće ničo wo Serbach w Němskej słyšeli njeběchu.

Tajke zetkanja a rozmołwy běchu wosebje šulerjam Serbskeho gymnazija Budyšin nastork, rozmyslować wo móžnosćach, serbskosć ludźom za mjezami Łužicy zbližić. Tehdy 16- do 17lětni chcychu přez młodźinske akcije a zarjadowanja serbsku kulturu hajić a pěstować a ju mjez młodźinu skrućeć. Za to załožichu towarstwo. Dopominajo so na zetkanje w Krakowje, hdźež běchu serbsku chorhoj kaž murju před sobu njesli, rozsu­dźichu so za mjeno Serbska murja. Na załoženskej zhromadźiznje wu­zwolichu Pětra Dźisławka za předsydu a Kiru Hrjehorjec za městopředsydku. Wobaj dźensa w Lipsku medicinu studujetaj, čłon předsydstwa Florian Kießlich studuje w Ber­linje medicinsku techniku. Towarstwo, kotrež ma jědnaće čłonow, je hnydom po załoženju Domowinskej župje „Jan Skala“ přistupiło.

Jedna z prěnich wot Serbskeje murje organizowanych akcijow bě w meji 2017 spěwny wječor w Jaseńcy, z kotrymž ­žnějachu jara dobry wothłós. Nimo lu­dowych a modernych spěwow su tam tež samokomponowane štučki zaklinčeli. W swojich rjadach maja wšak wjacore hudźbne talenty. Pětr Dźisławk zaruča teksty, mjeztym zo so Michał Donat ­wo melodiju stara. Hdyž přewjedźechu w Budyskim Kamjentnym domje reje wosebiteho razu z něhdźe 220 wobdźělnikami, bě poradźene zarjadowanje towarstwu dopokaz, zo po prawym puću kroča. Nimo DJjow hudźachu tam prěni raz hercy serbskeje młodźinskeje projektneje band. Sydom hudźbnikow pi­skaše přewažnje znate serbske rejwanske štučki. Přewšo spokojom z wotběhom a wobsahom bě tež Till Blanija, ­kiž je tehdy jako eventmanager ze Serbskej murju prěni króć we woblu­bowanym sociokulturnym srjedźišću ­sprjewineho města tajki wječor orga­nizował.

Nimo poradźenych zarjadowanjow zwaži so Serbska murja tež na dalše naročne wužadanja. Před lětomaj zestajana app QUIZ SERB z něhdźe 1 000 prašenjemi je wjele wužiwana. Koronapandemije dla Serbska murja lětsa žane zjawne zarjadowanja předwidźane nima. Za to chce towarstwo nowu wersiju mjenowaneje app wudać. Ta změje polěpšenu funkciju z hišće wjac prašenjemi. Na nowym hudźbnym wideju Pětr Dźisławk a Florian Kießlich tuchwilu dźěłataj. Tež tón budźe wo angažowanym skutkowanju młodeho młodźinskeho towarstwa swědčić. Alfons Handrik

Veröffentlicht in Lokalka

Galerie

dalši wobraz (1)
Bitte anmelden, um einen Kommentar zu posten

Anzeige