Lěpše wuměnjenja za sportowanje maja nětko w Kulowje. Tam su sej sportowcy móhłrjec sami wulke přeće spjelnili a sej nowe socialne twarjenje natwarili.
Kulow (SN/MWj). Na Kulowskim sportnišću při Koćinskej dróze je towarstwo DJK Módro-běli Kulow minjenu sobotu swoje nowe socialne twarjenje oficialnje přepodało. Požohnował je je wosadny farar dr. Wolfgang Křesák. K přitomnym čłonam sportoweho towarstwa porěčeštaj mjez druhim bywši Kulowski měšćanosta Udo Popjela, kiž je so za nowotwar sobu angažował, a cyłoněmska předsydka katolskeho zjednoćenstwa DJK (Deutsche Jugendkraft) Elsbeth Beha.
Wot lěća 2019 su na nowym socialnym twarjenju dźěłali. Wone nasta na městnje dotalneho sanitarneho twarjenja. W nim běchu nuzniki skóncowane a tepjenje často defektne. Scyła bě dom chětro dodźeržany, a tak dyrbjachu jón z nowym narunać. Nětko maja za hrajerjow kaž tež za přihladowarjow zaso porjadne sanitarne připrawy. Nimo toho nastachu přebywanska rumnosć, płokarnja za sportowu drastu a skład za sportowe wuhotowanje towarstwa.