Pola Wojerec planuje krajny zarjad za rěčne zawěry klětu wobšěrne saněrowanje nasypa podłu Čornicy a Čorneho Halštrowa. Přihotowanske dźěła tam hižo z połnej paru běža.

Wojerecy (SN/MWj). 18 nowych kwartěrow za njetopyrje je Wojerowska wodowa mištrownja wčera při Čornym Halštrowje pola Wojerec připrawiła. Njetopyrjowe kašćiki su jedna z wjacorych kompensaciskich naprawow za planowane saněrowanje nasypa podłu Wojerowskeje Čornicy a Čorneho Halštrowa, štož maja za přichodne lěto předwidźane. Kaž krajny zarjad za rěčne zawěry (LTV) informuje, trjebaja rozdźělne družiny njetopyrjow tež rozdźělne kwartěry. Tohodla zasadźa w swojej akciji tři wšelake njetopyrjowe kašćiki. Zo bychu małe cycaki swój nowy domicil tež přiwzali, připrawja je we wysokosći znajmjeńša štyrjoch metrow. Dokelž maja njetopyrje rady ćopło, njesmědźa jich kašćiki do sewjera wu­směrjene być. Nimo toho dyrbitej přilět a wotlět bjez zadźěwkow móžnej być.