Přepodaće nadawkow ma so w běhu jednoho měsaca stać

Wojerecy (AK/SN). Klinikum łužiskeje jězoriny Wojerecy tzwr změje wot měrca noweho jednaćela. Za to je so wutoru tamniša měšćanska rada wuprajiła.

Gremij wotwoła jednaćela Jörga Scharfenberga a powoła Mirka Papenfußa do zastojnstwa. Scharfenberg bě klinikum wot lěta 2015 nawjedował. „Wón je tójšto za město Wojerecy zdokonjał a je prěnje kroki strukturneje změny zawjedł. Zdobom je wužadanjam digitalizacije wotpowědował. Pod jeho nawodom je klinikum na wukonliwosći přidobył. Ludnosć ma klinikum za jara hódny.“ Takle dźakowaše so wyši měšćanosta Torsten Ruban-Zeh (SPD) rozžohnowacemu so jednaćelej.