Slepo (JoS/SN). Z programom „NEUSTART KULTUR“ spěchuje Zwjazk tuchwilu z nimale miliardu eurow 90 dźělnych pomocnych programow w medijowym a kulturnym wobłuku. Serbski kulturny centrum (SKC) Slepo z toho tohorunja profituje. „Tež my wužiwamy składnosć, so na znowawotewrjenje našeho domu derje přihotować. Po tym zo smy loni zachod znowa wuhotowali, přetworjamy nětko běrowowu chódbu na galeriju. Přichodnje ma wona trochu šěrša być“, rozłožuje nawodnica SKC Sylwija Panošina. Informaciska sćěna ma so potom w zelenej barbje błyšćić. Tam chcedźa najprjedy wobrazy Uty Stastny ze Slepoho předstajić. Jeje loni 1. nowembra wotewrjenu wustajeńcu „Impresije zbliska a zdaloka“, kotruž je lědma štó widźał, su zaso wottwarili. Chcedźa pak ju potom jako prěnju pokazać – w ćmowozelenej barbje perfektnje wobswětlenu. Saněrowanske dźěła ma Slepjanski fachowy zawod na starosći.