Hižo loni w měrcu bu katolska pěstowarnja swjateje Marije w Kulowje, kotraž je w nošerstwje katolskeje wosady Marije donjebjeswzaća, z cyłkownej ­kapacitu za 215 dźěći dotwarjena. ­Wčera su dom nětko poswjećili.

Kulow (aha/SN). Nošer kubłanišća, Kulowska katolska wosada, měješe z tamnišej měšćanskej radu, kotraž bě so wo wšě twarske naležnosće starała, předwidźane, přepodaće a žohnowanje zwjazać ze swjedźenjom za wšěch na twarje wobdźělenych kaž tež za staršich wšěch tuchwilu 197 dźěći w starobje wot jednoho lěta a 70 chowancow horta.

Koronapandemije dla běchu zarjadowanje wjacore razy přestorčili. Tak dojednaštej so Kulowska katolska wosada a měšćanska rada, to wčera, njedźelu, nachwatać. Nawodnica kubłanišća Thèrése Hörauf njemóžeše na zarjadowanje kaž předwidźane wšěch na twarje wobdźělenych a staršich witać, tak zo běchu tam město předwidźanych 600 ludźi jeničce třicećo – mjez nimi Zhorjelski biskop Wolfgang Ipolt, wosadny farar dr. Wolfgang Křesák kaž tež Kulowski měšćanosta Markus Posch (CDU).