Kulow (SN/JaW). Kulowski měšćanosta budźe tež dale Markus Posch (CDU). Wón ma tuž přichodne sydom lět dźěławosć w měsće a jemu přisłušnych tež serbskich wsach nadal nawjedować a wostanje tuž cyle po swojim wólbnym hesle „dale při wěcy“.
Jako jenički kandidat za načolnistwo w Kulowskej radnicy nažnja 51lětny Posch wčera cyłkownje 94,31 procentow wšěch wotedatych hłosow, zdźěli Kulowske měšćanske zarjadnistwo. Tak nastupi swoju druhu wólbnu dobu w srjedźołužiskim městačku. Cyłkownje je hač do 18 hodź. 52,34 procentow wobydlerjow Kulowa – něhdźe 500 z nich bě z listom woliło – wólbne lokale, w kotrychž dźiwachu mjenje abo bóle kruće na hygienowe předpisy wo škiće před koronawirusom, wopytało a wo měšćanosće rozsudźiło. To je nimale 20 procentow mjenje hač před sydom lětami. Tehdy njebě žadyn z pjeć kandidatow w prěnim přechodźe trěbnu wjetšinu docpěł. Rozsudźiło bě hakle druhe wólbne koło mjez Beatu Hufnagel a Markusom Poschom, hdźež dósta wón 63 procentow.
