W sprjewinym měsće stajnje něhdźe něšto twarja. Jedne tajke wjetše twarnišćo je nětko na Drježdźanskej dróze. Tam je so stara kupnica zminyła, a nowa mjeztym nastawa.

Budyšin (CS/SN). Po tym zo bě w Hornjej Kinje nowa kupnica Edeka nastała, su nakupowanišćo Diska na Drježdźanskej dróze w Budyšinje zawrěli. Jeho personal dźěła nětko w Hornjej Kinje. W krótkim času bu stara kupnica Diska nimale dospołnje spotorhana. Jenož dwě wonkownej sćěnje stej stejo wostałoj. Na tymle terenje wikowanska syć Aldi-sewjer nowu kupnicu twari, jeno 300 metrow wot stareje zdalene. Za to je Aldi-sewjer ležownosć kupił, kaž nowinarski běrow předewzaća informuje.