Wojerecy (SN/MWj). Wot dźensnišeho hač do 14. nowembra móža wobydlerjo města Wojerec swoje namjety za tak mjenowany wobydlerski budget 2022 zapodać. Kónc septembra běchu měšćanscy radźićeljo wobzamknyli tajku akciju mjeztym štwórty raz přewjesć. Wobydlerjo města a přisłušacych wsow móža nětko ideje zapodać, kak hodźał so jich žiwjenski wobswět porjeńšić, štož měło prawje wjele ludźom na dobro być, rěka w nowinskej zdźělence města.
Za wobydlerski budget je znowa 70 000 eurow k dispoziciji, kotrež su w cyłkownym měšćanskim etaće zapisane. Hłownje runa so procedura zašłym lětam. Přiwšěm maja tónraz mału změnu. Při namjetach za město maja maksimalnu sumu 10 000 eurow wobkedźbować. Za wjesne dźěle płaći hranica 4 000 eurow. Minjene lěta wučinješe hranica namjetow za město 15 000 eurow. Koordinowaca skupina wobydlerskeho budgeta bě so za redukowanje wuprajiła, zo móhli na kóncu wjace idejow zwoprawdźić. Tak nětko přeća za wobšěrnym saněrowanjom pućow, nowe plestrowanje chódnikow kaž tež twar nowych parkowych připrawow a wodomjetow dowolene njejsu.
