Městno, hdźež so Sprjewja do hłowneje a Małeje Sprjewje dźěli, maja ryby přichodnje lěpje přewinyć móc. Za to tuchwilu tójšto pjenjez inwestuja. Tele dny dožiwichu tam twarsku wosebitosć.
Lichań (UM/SN). Nowy móst su předwčerawšim při spušćadle na kromje Lichanja (Spreewiese) stajili, a to tam, hdźež so Mała Sprjewja wot hłowneje dźěli. Z wosebitym transportom bě móst wjacore dny z badensko-württembergskeho Engena do wuchodneje Sakskeje po puću był. „15 metrow dołhi nastroj je z aluminija a waži jeno štyri tony“, rozłožuje projektny nawoda Daniel Steinmüller z krajneho zarjada rěčnych zawěrow (LTV). Přez móst dóstawaš so na mały čwak zemje mjez woběmaj rěkomaj. Tónle čwak stanje so mjenujcy z kupu, dokelž twarja při spušćadle tak mjenowanej rybowej schodaj.
Twarske dźěła traja hižo cyłe lěto. „Přetwar ma tomu dopomhać, zo móža ryby a dalše žiwochi w rěce wottud po 40 kilometrach přez Minakał a Łaz hač do bliskosće Sprjejc pućować, hdźež so Mała Sprjewja z hłownej zaso zjednoća“, nawoda projekta wuswětla.
