Rakecy (TL/SN). Poslednje tydźenje lěta su za Clemensa Hensela z Budyšina čas, hdyž ma najwjace dźěła. Wón wikuje z najwšelakorišimi wudźěłkami za wohnjostroje. Za jich předań do silwestra ma swój skład mjeztym derje pjelnjeny. Wot lěta 2008 je wón ze swojim předewzaćom za wohnjostroje w Budyšinje a wokolinje po puću. 2014 kwalifikowaše so na tak mjenowaneho wulkowohnjostrojnika a staraše so wot toho časa wo njeličomne wohnjostroje na najwšelakorišich zarjadowanjach, kwasach a narodninach. Wot 2015 ma Hensel tohorunja wobchod w Budyskim nutřkownym měsće. Nic jeno z Budyšina, ale z cyłeje wuchodneje Sakskeje ludźo k njemu jězdźa, zo bychu sej tón abo tamny wosebity praskotak wobstarali. Wjace hač sto wšelakich wudźěłkow ma wón na składźe, kotryž je sej w bywšim bunkru Rakečanskich mechaniskich dźěłarnjow zarjadował.