Wuprajenja Budyskeho zastupowaceho krajneho rady Udo Wićaza (CDU) na póndźelnej demonstraciji k šćěpjenskej winowatosći strowotniskeho wobłuka wuwabja we wokrjesu, na runinje Sakskeje, ale tež Zwjazka wulku kritiku.
Budyšin (SN/BŠe). „Njeakceptujemy, zo k tomu namołwjeja prawo łamać“, wuzběhny sakski hospodarski minister Martin Dulig (SPD) po wčerawšim kabinetnym wuradźowanju nastupajo słowa Budyskeho zastupowaceho krajneho rady Uda Wićaza. „Wón ludźi nałži a jim sugeruje, zo móže sam rozsudźić, hač zakonske postajenja nałožuje abo nic“, Dulig rozłoži. „Tohodla zadźerženje Wićaza wótrje zasudźamy.“ Mjeztym je tež znate, zo ma Budyski krajny rada Michael Harig (CDU) stejišćo wo swojim zastupjerju sakskej krajnej direkciji zapodać.
Wčera je Udo Wićaz wozjewił, zo čuje so wopak zrozumjeny. Budyski wokrjes zakoń wo škiće před infekcijemi zwoprawdźi. „Přičiny zastaranskeje wěstoty dla, kotruž dyrbimy zaručić, pak njeje z dźensnišeho wida móžno sobudźěłaćerjam přistup do zarjadnišćow zakazać, a tak chcychmy jich strach pomjeńšić“, Wićaz wujasni.
