Wojerecy (AK/SN). We wobłuku změny strukturow chce město Wojerecy wobydlerjow kaž tež wopytowarjow sobu zapřijeć. To je zaměr informaciskeho a zetkawanskeho centruma Swětłowy dwór w starej radnicy. „Tu móža so zajimcy wo projektach města wobhonić. Tež šulske rjadownje móža sem přińć, a to nic jeno z města“, rjekny wyši měšćanosta Torsten Ruban-Zeh (SPD) na srjedownym wotewrjenju.
Kompjuterowy muzej Konrada Zuseho je Swětłowy dwór wuhotował, Załožba łužiskeje jězoriny je z 31 000 eurami financowanje zawěsćiła.
Wo strukturnej změnje w měsće a wokolinje informuja na wulkej wirtuelnej tafli. Na njej předstajeja pjeć projektow města. Su to nowoměšćanski forum, Łužiska kupjel, změna zastaranja z ćopłotu, zwjazk pitneje wody a centrum za twarjenje a bydlenje. Hač do kónca lěta ma internetna platforma nastać. Na njej chcedźa swoje projekty strukturneje změny tohorunja předstajić, kaž projektowa managerka Sarah Stötzner rozłoži.
