Gmejna chce z wotnajerjom stanowanišća dołhodobnje hromadźe dźěłać

Hamor (AK/SN). Z nowym wotnajerjom stanowanišća „Hwězdny camp“ při Bjerwałdskim jězoru chce Hamorska gmejna dołhodobnje hromadźe dźěłać. K tomu wuzna so předwčerawšim gmejnska rada. Jednohłósnje wobzamknychu radźićeljo druhu změnu zrěčenja wo přenajeću stanowanišća. W nim dźe wo přiměrjenje podruže za twarjenje recepcije wot štyrjoch eurow na kwadratny meter na 4,90 eurow na kwadratny meter. „Wot 1. nowembra mamy z Peterom Hessu noweho wobhospodarjerja. Po wobšěrnym postupowanju smy jeho našli“, wuswětli Roman Krawc, wot 2010 projektowy koordinator za Bjerwałdski jězor w Hamorskej gmejnje. „Sadźamy na dołhodobne zhromadne dźěło. Wotnajenske zrěčenje je aktualizowane a móžemy je wo pjeć lět podlěšić. Opcija je, zrěčenje samo wo dalšich pjeć lět podlěšić.“