Koćina (aš/SN). Po koronowej přestawce su sej minjeny kónc tydźenja w Koćinje zaso wjesny swjedźeń wuhotowali. Na­jebać tróšku šěre wjedro su pjatk wječor piwo natočili a na wšěch 300 hosći hejsowaše hač do rańšich hodźin k zwukam DJja Erixøna.

Wot soboty připołdnja měrješe dohromady 13 mustwow mocy we wolejbulowym turněrje. Wysoka kwalita hrow a fairna mjezsobnosć dominowaštej hač do kónčneje hry a mnoho přihladowarjow atmosferu wobrubi. Naposledk přesadźi so mustwo „Dwójna nula“ w horcym boju přećiwo wubrance UCfK. Třeće městno wobsadźi mustwo „Die Netzroller“. Sobotu wječor rěkaše zaso: Asparagus Open Air. Něhdźe 500 hosći přichwata na rjenje wuhotowany areal a DJje Erixøn, Housejunkee a BEKZ starachu so wo trěbne hudźbne wuhotowanje hač do rańšich zerjow.