Po dwulětnej přestawce w Lessingowym měsće znowa swjeća
Kamjenc (SN/JaW/SŽu). Wot jutřišeho pjatka knježi w Kamjencu zaso wuwzaćny staw. To wšak njezadźiwa, swjeća dźě tam po dwulětnej přestawce koronapandemije dla hač do 25. awgusta šulski a domizniski swjedźeń – Kamjensku Boršć.
Zazběh swjedźenskeho tydźenja twori zhromadny koncert Kamjenskeho dujerskeho orchestra ze serbskej dujerskej kapału Horjany a chórom Lessingoweho města Kamjenc jutře, pjatk, w 19.30 hodź. na torhošću, kaž město Kamjenc a organizatorojo w nowinskej zdźělence informuja. Najwažniše na Kamjenskej Boršći wšak su swjedźenske ćahi po nutřkownym měsće, kotrež lětsa znowa budu. Wjac hač tysac běłu drastu woblečene šulske dźěći poćahnu póndźelu a štwórtk z kwětkowej pychu a chorhojemi po měsće. Swjedźenske ćahi zahaja na šulskim naměsće – póndźelu, 22. awgusta, w 13 hodź. a štwórtk, 25. awgusta, poł hodźiny pozdźišo.