Třeće zarjadowanje lětušeje kulturneje zymy w Chróšćanskej putniskej hospodźe je sej minjenu sobotu tele mjeno zawěrno zasłužiło. Mjeztym zo so wonka sněhowaše, dožiwichu wopytowarjo nutřka adwentne čitanje w runjewon swójbnej atmosferje.
Chrósćicy (SN/MWj). Zběrka powědkow, miniaturow a esejow Měrany Cušcyneje „Stop a stup“ steješe w srjedźišću dalšeho zarjadowanja 11. kulturneje zymy w Chróšćanskej putniskej hospodźe. Na zhromadny wječor z Ludowym nakładnistwom Domowina witaše putniska mać Monika Gerdesowa awtorku kaž tež komponista Jana Cyža. Při horcym winje dožiwi horstka připosłucharjow zabawny wječor, kiž je dušu zhrěł.
