Klětu čakaja wusahowace nadawki na gmejnu a gmejnskich radźićelow. Na planje steja wšelke twarske předewzaća, na přikład twar noweje pěstowarnje.
Róžant (JK/SN). Słódna wječer je čłonam gmejnskeje rady Ralbicy-Róžant po jich poslednim lětušim posedźenju zawěsće zesłodźała. Lětušu dźěławosć postajowachu předewšěm přihoty za nowotwar Ralbičanskeje pěstowarnje. Twarske dźěła klětu nalěto zahajić, kaž to wjesnjanosta Hubertus Ryćer (njestronjan) na posedźenju radźićelow minjeny štwórtk praji. Twarjenje ma so w třećim kwartalu 2024 (swojemu zaměrej) přepodać. Paralelnje k nowotwarej chcedźa nětčišu pěstowarnju na hort přetwarić. Za to trěbne srědki su nětko zaručene a přez spěchowansku banku wobkrućene. Płaćić ma cyły projekt 8,46 milionow eurow, 7,61 milion z toho su spěchowanske srědki. To předleži nětko „čorne na běłym“. Gmejna liči z tym, zo přihotowanske a wosebje twarske dźěła dosć derje wotběža. W januarje 2023 wotměje informaciske zarjadowanje wo twarskim projekće, na kotrymž gmejna hišće raz wšitke parametry a ličby kaž tež plan wotběha předstaji.
