Twarski projekt w Rakecach njemóžachu hladajo na jeho substancu hižo dlěje wotstorkować. Z wjetšim předewzaćom porno tomu dotal hišće wjele dale přišli njejsu.

Rakecy (UM/SN). W Rakečanskim hrodowym parku tuchwilu wonkownu murju k zwjazkowej dróze B 96 saněruja. Po wuprajenju nowinskeho rěčnika statneho zawoda Sakski imobilijowy a twarski management (SIB) Alwina-Rainera Zipfla jedna so wo dźělnu twarsku naprawu, kotruž su z cyłkowneho saněrowanja hrodu wuspinkowali. To bě trěbne, dokelž bě twarski staw murje jara špatny. Nimo toho dyrbješe so wobchadna wěstota zaručić. Po słowach Zipfla saněruja murju pod dohladom pomnikoškita. Projekt płaći něhdźe 600 000 eurow a ma klětu wotzamknjeny być.