Do hód su loni w Barće wjacore bažanty w jich klětce mortwe namakali. Wo přičinach a wobstejnosćach je so wjele spekulowało. Mjeztym je jasne, zo ptača gripa na tym wina njebě.

Bart (UM/SN). Plahowanje bažantow ma w Barće jara dołhu tradiciju. Hižo 1753 da hrabja von Gersdorff bažantownju natwarić. Za to je wjacore ležownosće kupił a měnjał, tak zo nasta zwisowaca płonina z měšanym lěsom, hdźež so za hońtwu plahowane ptaki derje čujachu. Tež w nowšim času běchu pospyty, w ptačej klětce při sportnišću na tradiciju nawjazać, ale dołhi čas bjez wuspěcha. „Hakle nětčišemu mějićelej je so poradźiło ­bažanty plahować“, we Malešanski wjesnjanosta Matthias Seidel (CDU). Mnozy wobydlerjo Barta a wokolnych wsow sej při wuchodźowanju ptaki wobhladachu a so nad nimi wjeselachu.