„Deutschlandfunk“: Statne rěčnistwo přepytuje – kónc pak jasny njeje
Budyšin (SN/mb). Medialna bomba wčera připołdnju na „Deutschlandfunk Kultur“ rozbuchny. Tema: Wotkrywanje pozadkow lońšeho skandala dokoławokoło tehdomnišeje internetneje strony „wahrheit-krabat.com“. Njeznaći awtorojo běchu dołholětnemu Njebjelčanskemu wjesnjanosće Tomašej Čornakej wumjetowali, na dobro syće přećelow a nic w zajimje gmejny jednać. Prawniski dohlad Budyskeho krajneho zarjada bě pozdźišo Čornakej zdźělił, zo wón korektnje dźěłaše. Čornak a jeho naměstnik Tomaš Klar, přeco hišće zastupowacy wjesnjanosta a tohorunja na tutej stronje mjenowany, staj lětsa kónc januara w interviewje z našim wječornikom swój wid na tule njewšědnu kampanju wopodstatniłoj.