Gmejnska rada pyta dale za stejišćom k planowanej připrawje

Róžant (JK/SN). Gmejnska rada Ralbic-Róžanta měła sej skónčnje stworić jasne stejišćo k planowanej fotowoltaikowej připrawje pola Šunowa. Tole žadaštaj sej na zašłym posedźenju komunalneho parlamenta jeho čłonaj Josef Woko ­(Swobodni wolerjo Delany) a Eduard Luhmann (CDU). Dotalnej dwě informaciskej zarjadowani njejstej wosebje pola wobydlerjow a tež nic pola radźićelow k tomu wjedłoj, sej wu­tworić přezjedne měnjenje za abo přećiwo tajkemu předewzaću Mišnjanskeje firmy UKA.

Podobne předewzaća w druhich abo susodnych gmejnach wjedu k podobnemu wotběhej kaž w gmejnje Ralbicy-Róžant. Gmejnske rady njemóža so rozsudźić, hač wupraja so za abo přećiwo tajkim připrawam. Na jednej stronje wabja financielne lěpšiny, na tamnej pak so napohlad přirody změni a z tym žiwjenske wobstejnosće wobydlerjow. Tohodla je trěbne, sej tworić jasne měnjenje k temje.