Bórk (JoS/SN). Stajnje prěni kónc tydźenja w septembru wotměwa so w Bórku pola Wojerec wjesny swjedźeń. Tónle termin maja wobydlerjo w protyce kruće zapisany. Tuž so woni minjenu sobotu k zhromadnemu kofejej zetkachu. Hižo wječor do toho bě młodźina na diskoteku prošena. Za nju běchu we wsy a wokolinje namołwjeli, zo móhli so zajimcy raz jako diskotekar wuspytać. Šesćo tónle poskitk wužichu. Sobotu móžachu so najmjeńši wopytowarjo šminkować dać. Starši pospytachu w tomboli swoje zbožo a někotrežkuli rjane myto dobychu.
Na poprawny wjeršk běchu předewšěm dźěći dołho čakali. Za nje natwarichu mjenujcy nowe hrajkanišćo, kotrež składnostnje wjesneho swjedźenja přepodachu. To wobstaraštaj ze symboliskim přetřihanjom banćika wjesnjanosta gmejny Sprjewiny Doł Manfred Heine a wjesna předstejićerka Bórka Veronika Büschel. Holcy a hólcy so wězo dołho prosyć njedachu a pěskowy kašćik, karusel, suwadło, čumpjel a krosnowadło wuspytachu. Gmejna je tule 50 000 eurow inwestowała, z toho je 20 000 eurow spěchowanskich srědkow.
