Worklečanska šwalča Petra Kupcyna je hižo za njeličomnych kupcow we Łužicy najwšelakorišu serbsku narodnu drastu šiła. ­Někotre razy je tajku samo za ludźi w ­europskim wukraju zhotowiła. Lětsa pak měješe premjeru wosebiteho razu. Prěni raz je za kupca zwonka Europy dźěłała.

W awgusće je Emmerichec swójba z kanadiskeho Toronta Worklečanku wopytała. Nan, mać a 15lětna dźowka pytachu we Łužicy za nanowymi prjedownikami. Jeho dźěd bě mjenujcy něhdy z Njeswačidła do sewjerneje Ameriki wupućował. Potomnikow dźěda Emmerichecy w Njeswačidle samo namakachu. „A zo bychu doma w Kanadźe wosebitu dopomnjenku na swójbne stawizny měli, mje prošachu, zo bych za 15lětnu dźowku Budysku serbsku drastu zešiła, a to fijałkojtu, ale bjez wušiwanjow“, Petra Kupcyna powěda. To je wězo rady činiła a za něhdźe štyri dny bě drasta hotowa.