Wojerowski koparski klub nowy partner města za sportowej zarjadnišći

Wojerecy (AK/SN). Dokelž so sportowy zwjazk Łužiska jězorina Wojerecy rozpušći, skónči so kónc lěta wotnajenske zrěčenje z městom Wojerecy. Wone płaćeše wot lěta 2003 za Stadion Friedricha Ludwiga Jahna kaž tež za sportowy forum. Měšćanscy radźićeljo su na swojim zašłym posedźenju zběhnjenju zrěčenja přihłosowali. Runočasnje woni wyšeho měšćanostu Torstena Rubana-Zeha (SPD) społnomócnichu, z Wojerowskim koparskim klubom nowe zrěčenje wujednać a wotzamknyć. Zdobom wobzamknychu financowanje přichodneho wobhospodarjenja wobeju sportoweju zarjadnišćow. Wyši měšćanosta so sportowemu zwjazkej za wjelelětne zhromadne dźěło dźakowaše a wuzběhny, zo su strukturne přičiny k změnam wjedli. Radźićel Uwe Blazejczyk (SPD) so tutomu dźakej přizamkny.