Budyšin (CS/SN). Na wuchodźe Budyšina namakamy měrnu předměšćansku Renatusowu dróhu. Dokelž pomjenowachu ju runje před 100 lětami tak, su so tamniši wobydlerjo za pozadkom mjena wobhonili a chcedźa jeje stotu róčnicu woswjećić.

Swoje dźensniše mjeno dósta dróha w lěće 1925. Wolfgang Jironsek, jedyn z wobydlerjow Renatusoweje dróhi, bě wćipny a započa rešeršować, zwotkel dróha swoje mjeno ma. W měšćanskim archiwje wón trěbne informacije namaka. Tak tamnych wobydlerjow za temu zahori. Wot toho časa so wobydlerjo prawidłownje zetkawachu a ideju jubileja dróhi zrodźichu. Prěni wuslědk jich zetkanjow je taflička z wujasnjenjom dróžneho mjena. Tutu tafličku su wčera wotkryli, tak je nětko zjawnosći přistupna.