Budyšin. Prěni festiwal YOUCO woswjeća tónle pjatk, 16. meje, wot 12 hodź. w a před Němsko-Serbskim ludowym dźiwadłom. „Koncept festiwala je, zo jón młodostni za młodostnych wuhotuja“, tak Beno Brězan, kotryž je ideju we wob­łuku projekta Bautzenrocks zrodźił. W srjedźišću festiwala steji, potrjebu młodostnych sylnišo do zjawneho žiwjenja integrować. Dalši akcent zarjadowanja je, zo je festiwal njepolitiski. Młodostni móža hry hrać, kreatiwni być a so jedyn wo druheho starać. Z tym je festiwal zakład zhromadnosće bjez politiskich ambi­cijow. „Nadźijomnje młodostni tak zrozumja, zo je wo wjele wažnišo mjezsobne kontakty tworić hač jedyn druheho wumjezować.“ A třeći stołp koncepta je, zo kóždy wobdźělnik ze swójskimi resur­sami a nic z wulkim popłatkom poradźenju festiwala přinošuje. Trěbnu financielnu podpěru dóstawaja Beno Brězan, jako zrodźer ideje za festiwal, a młodostni, kotřiž w projekće Bautzen.Rocks skutkuja, wot města Budyšin a w sprjewinym měsće zasydlenych předewzaćow.