Njeswačanscy radźićeljo dyrbja gmejnske financy zaso sporjadkować
Njeswačidło (JK/SN). Městna w sydarni Njeswačanskeje radnicy wutoru wječor njedosahachu, telko wobydlerjow bě přichwatało. Wšitcy chcychu zhonić, kak z gmejnu dale dźe. Přitomny bě profesor Gerald Swarovsky w nadawku Budyskeho krajnoradneho zarjada. Wón ma Njeswačanske financy zaso na tajki staw přinjesć, zo móže komuna samostatnje wšitke jej dowěrjene a za nju wažne nadawki a winowatosće spjelnić.
Za to je trěbny tak mjenowany koncept za strukturu hospodarskeho plana. Koncept wobsahuje naprawy a móžnosće, z kotrymiž gmejna dosć dochodow zawěsći a swoje wudawki redukuje. Na 126 stronach je profesor Swarovsky wšitke tute móžnosće a naprawy zjimał. Při tym njezataji, zo mějachu w Njeswačidle wjele lět přewysoke wudawki a njedosahace dochody a zo su jich nadawki prosće přežadali. Jeli naprawy koncepta zwoprawdźa, změja po lětach zaso wuwaženy poměr mjez dochodami a wudawkami. To budźe bolostny čas, ale bjez tajkich naprawow njepóńdźe.
