Holešowska Dubrawka. Ze wšěch kónčin Swobodneho stata Sakskeje zetkaja so na přichodnymaj kóncomaj tydźenjomaj najwuspěšniši jěcharjo konjaceho sporta w Holešowskej Dubrawce. Tam so wo titul sakskeho mištra wubědźowali. Jěcharjo na ponyjach a młodźi jěcharjo w starobje wot 14 do 21 lět kaž tež seniorojo zetkaja so wot 13. do 15. junija. Slědowacy kónc tydźenja wot 20. do 22. junija startuja dresurowi jěcharjo we wubědźowanju wo mišterstwo. Předsyda Njeswačanskeho jěchanskeho a jězbneho towarstwa Frank Lehder je přeswědčeny, zo lětuše sakske mišterstwa runje tak derje wuhotuja kaž lońše.
Wulki skakanski areal, kotryž su loni wobšěrnje saněrowali, je na woběmaj kóncomaj tydźenja pruwowanske městno. Jedna z přičinow, čehoždla so sakscy jěcharjo znowa za mišterstwa w Holešowskej Dubrawce rozsudźichu, su tudyše wulkotne wuměnjenja. „To wšitko je jenož móžno dźakowano angažementej našich sobustawow, pomocnikow a předewšěm sponsorow. Na tutym městnje hižo wulki dźak za wulkotnu podpěru!“, praji Frank Lehder.
