Malešecy (CS/SN). Z dnjom wotewrjeneje wsy zahajichu wčera 800. róčnicu prěnjeho pisomneho naspomnjenja Malešec. Z tymle dnjom bě wjele nostalgije zwjazane, přetož na mnohich městnach na dawne a bliše stawizny wsy zhladowachu.

Wosebje bywši hosćenc „K wódnemu mužej“ skićeše přičinu, na zašłe časy spominać. Něhdy tradiciski dom njeje ­hižo regularny hosćenc, ale bě jenož wurjadneho jubileja dla wočinjeny. Znajmjeńša móžachu sej tam wopytowarjo wčera kofej a tykanc słodźeć dać a při tym pobjesadować. Ludowe nakładnistwo Domowina poskićeše wuběr swojich aktualnych wudaćow. Runja hosćencej tež žurla na hornim poschodźe hižo dlěši čas žane zarjadowanje dožiwiła ­njeje. Wčera bě wona takrjec serbskim ­temam wěnowana. Wopytowarjo móžachu jutrowne jejka debić, walkować a sej wustajeńcu drastowych klankow Moniki Cyžoweje wobhladać. Mjez druhim bě serbski katolski kwasny ćah widźeć. Malešanska Domowinska skupina je z wjele prócu wustajeńcu serbskich a němskich nowinskich wurězkow wo tym zestajiła, kak je so serbske žiwjenje w Malešecach w zašłych lětdźesatkach wuwiło.