Dźeń rjemjesła dźensniše a něhdyše žiwjenje we wsy wotbłyšćował
Chrósćicy (SN/MWj). Nimo swjedźenskeho ćaha wčera bě sobotu dźeń rjemjesła dalši wjeršk swjedźenskeho tydźenja k 800. róčnicy Chróšćanskeje wosady a gmejny. Organizatoram wokoło Jana Wjesele bě so z wjele prócu poradźiło, dźěl dźensnišich rjemjeslnikow a přemysłownikow wsy předstajić, ale tež na tych dopominać, kotřiž su tam něhdy jako předewzaćeljo dźěłali. Z tym stworichu zajimawy zwisk mjez stawiznami a přitomnosću Chrósćic.
Tójšto wjesnjanow, wopytowarjow z blišeje a dalšeje wokoliny a dźěći bě sobotu popołdnju pěši w Chrósćicach po puću, zo bychu z 18 přihotowanych stacijow tak wjele kaž móžno wopytali. Najdlěši puć mějachu ći, kotřiž chcychu sej w Prawoćicach Horbankec młyn wobhladać. Mnozy sej tam z konjacym zapřahom dojědźechu.
