Běła Woda (AK/SN). W lětach 1928 hač do 1930 natwarjeny a dźensa jako kulturny pomnik zapisany Ludowy dom w Běłej Wodźe chcedźa zachować a wožiwić. Za saněrowanje měli so po móžnosći srědki z fondsa za strukturnu změnu wužiwać. Tole je srjedu wjetšina měšćanskeje rady na namjet frakcije AfD wobzamknyła. „To je poslednja šansa dom wuchować, prjedy hač wón rozpadnje“, podšmórny radźićel Ronny Hentschel. „Ludowy dom měł so z centrumom inowacije, kultury a zarjadnistwa stać.“
Kaž z namjeta wuchadźa, móhli stawnistwo, zarjadnistwo pohrjebnišćow, skład a archiw w twarjenju zaměstnić. Škleńčerski muzej móhł tam tohorunja swój domicil měć, wšako bě to něhdy Dom škleńčerjow, kiž běchu z pjenjezami dźěłarnikow natwarili. Dwě žurli w Ludowym domje byštej dosć městna za wuměłstwo a kulturu skićiłoj. Zarjadować hodźeli so kwasy, młodźinske swjećby, reje, kinowe předstajenja a wjele dalšeho. Tež gastronomija hodźała so zapřijeć. W lěću móhła so wonka snano piwowa zahroda zaměstnić, w namjeće frakcije AfD dale rěka.
