Dźěłowy kruh přećiwo seksualizowanej namocy Budyskeho wokrjesa z toho wuchadźa, zo je w lěće 2023 w Budyskim wokrjesu něhdźe 5 000 dźěći a młodostnych wot seksualizowaneje namocy potrjechenych było. Sobudźěłaćerjo w kruhu skutkowacych zarjadnišćow so wo potrjechenych staraja.
Budyšin (SN/MiR). Pady, w kotrychž dźe wo seksualizowanu namóc přećiwo dźěćom, wučinja wjace hač połojcu wšitkich poradźowanjow. Při wšěm so seksualizowana namóc husto tabuizuje abo potrjecheni so hańbuja, wo njej rěčeć, wšako ju předewšěm přiwuzni, znaći abo wosoby z bliskeho socialneho wobswěta potrjechenych wukonjeja.
