Gmejnscy radźićeljo w Běłej Wodźe pragmatisce rozsudźili

Běła Woda (AK/SN). Energijowy koncern LEAG chce sportowe towarstwa w Běłej Wodźe nadal podpěrować, lětsa z 25 000 eurami. Jednohłósnje přihłosowaše srjedu tydźenja měšćanska rada lisćinje pjenježnych darow. Z tym je wona namjet frakcije AfD na změnu tuteje lisćiny ­akceptowała. W swojim namjeće žadaše sej frakcija wuwaženiše rozdźělenje srědkow mjez dohromady jědnaće sporto­wymi towarstwami. Měšćanski radźićel Ronny Hentschel (AfD) do wothłoso­wanja podšmórny: „Chcemy, zo po móžnosći wjele towarstwow z darjenych srědkow přinošk dóstanje. To zadźěwa njetrjebawšej njespokojnosći w ludnosći.“ Wyša měšćanostka Katja Dietrich (SPD) přispomni, zo na přikład sportowy wobłuk lodosporta tójšto financneje podpěry ze stron města dóstawa, mjez druhim lětnu přiražku za wobhospo­darjenje lodoweje areny. Nowe rozklu­čowanje pjenježnych darow na wšitke sportowe towarstwa je po jeje měnjenju tuž woprawnjene.