Ansambl Jarobinka lětuši rjad nazymskich koncertow zakónčił

Pančicy-Kukow (SN/bn). Žónski ansambl Jarobinka je předwčerawšim w kopaće połnej awli Šule Ćišinskeho w Pančicach-Kukowje lětuši rjad nazymskich koncertow Domowiny zakónčił. Pod hesłom „Spiwy z brunicowych regionow – Spěwy z brunicowych kónčin“ předstaji mjeztym pjeć lět wobstejacy cyłk pod nawodom Walburgi Wałdźic sep ludowych pěsnjow w swojoraznym wobdźěłanju, a to přewažnje w Slepjanskej narěči. Tak sposrědkowachu spěwarki za słowjansku hudźbu typisku melancholiju, kaž připowědźerka Diana Šołćina rozłoži, mjez druhim ze spěwami kaž „Wujšła, wujšła syrotka“ a „Schyliła jo se Jaro­binka“. Kontrast k tomu wutworichu ­ze skerje wjesołymaj štučkomaj „Dźo da sy ty była“ a „Ty sy taka wikojtata“, při čimž zanjesechu znatu „bitwu splahow“ delnjoserbsce. Program wopřijimaše ­nimo toho za dokumentarny film „Bei uns heißt sie Hanka – Pla nas gronje jej Hanka – Pola nas rěka wona Hanka“ ­nahrawanej spěwaj „Stoj ta lipa“ a „Gółub dwě běłej nožce ma“ a prěni raz tež ­hornjoserbski přinošk „Skakała je holička“.