Budyšin. Młodźinske towarstwo Pawk je tele dny na Budyskim Serbskim gymnaziju znowa swój wuspěšny format „Studenća pomhaja šulerjam“ organizowało. Studowacy posrědkowachu šulerkam a šulerjam, kotre móžnosće po maturje maja. Dohromady wužiwaše tutón poskitk něhdźe 50 młodostnych 11. lětnika Serbskeho gymnazija a dósta wobšěrny dohlad do studijnych a powołanskich pućow.

Po krótkim zawodźe zahajichu wjacore dźěłarnički, z kotrychž móžachu sej wobdźěleni dwě wuzwolić. Temy kaž financowanje studija a bydlenje, přebytk po maturje we wukraju abo tež předstajenje wšelakich formow studija skićachu drohotnu pomoc za orientaciju. Někotre dźěłarnički wuhotowachu studowacy, kotřiž swójske nazhonjenja rysowachu a tak swójsku awtentisku perspektiwu posrědkowachu.

Tomu sćěhowaše speeddating, při kotrymž młodostni w krótkich rozmołwach rozdźělne studijne směry a wukubłanske puće zeznachu. Cyłkownje 21 studowacych a wukubłacych předstaješe swoje ­fachowe směry – wot duchowno-wědomostnych přez techniske hač k medicinskim abo dualnym studijnym směram.