Posedźenje gmejnskeje rady bjez wočakowanych rozestajenjow
Njebjelčicy (JK/SN). Hižo do wčerawšeho posedźenja Njebjelčanskeje gmejnskeje rady, kiž bě lětsa zdobom poslednje, jewjachu so hłosy, kotrež so přećiwo wotmyslenym wobzamknjenjam rady měrjachu. Wosebje sportowcy SJ Njebjelčicy běchu namołwjeni, ze swojej přitomnosću na posedźenju pokazać, zo njejsu z postupowanjom gmejny we wěstych naležnosćach přezjedni.
W konkretnym padźe dźěše wčera wo to, wobzamknyć nowe zrěčenje mjez gmejnu a SJ Njebjelčicy wo wužiwanju a wobhospodarjenju sportoweho domu kaž tež sportnišćow w Njebjelčicach a Serbskich Pazlicach. Po nimale 34 lětach měło so zrěčenje po słowach wjesnjanosty Andréja Bulanka (njestronjan) znowa rjadować a na tuchwilne ćeže gmejny wusměrić. Wosebje wysoke wudawki za hladanje sportnišćow, kaž syćenje trawy a hnojenje trawnika gmejnu přežadaja. Po naćisku noweho zrěčenja měješe sportowa jednotka wjace nadawkow přewzać.
