Je drje lědma domjacnosće, hdźež w adwenće a hodownym času žadyn Boži narodk njesteji. W Šiborćicach (Nieder Seifersdorf) pola Zhorjelca je fararka na wuměnku Katrin Müller na wšěch 360 tajkich narodkow nazběrała. Zajimcy móža sej je wobhladać.

Šiborćicy (AK/SN). Štóž so za Bože narodki zajimuje, měł sej přichodny čas do Šiborćic pola Zhorjelca dojěć. Tam je fararka na wuměnku Katrin Müller kopicu tychle wuměłskich twórbow nazběrała. Ke kóždemu narodkej móže wona mału stawiznu powědać. Tak je 2021 tak mjenowany Oberlin-narodk darjeny dóstała, powěda 81lětna. Wón ­pochadźa z dźěłarnje za zbrašenych w Podstupimje. Figury nastachu hižo w 1950tych lětach. 360 narodkow z 49 krajow je Katrin Müller cyłkownje nazběrała.